Thu, 25 Feb 2021

Biyahe ng mga bus at van sa Cam Norte, maaari ng simulan sa Pebrero

Philippine Information Agency
22 Jan 2021, 18:38 GMT+10

DAET, Camarines Norte, Enero 21 (PIA) -- Maaari nang simulan ang biyahe ng mga bus at van sa Camarines Norte ganundin ang mga papasok at palabas sa lalawigan simula sa unang linggo ng Pebrero kung makakatugon ang mga operators sa mga requirement sa Special Permit.

Ito ang kinumpirma ng Land Transportation Franchising and Regulatory Board (LTFRB) sa pamamagitan ni Record Officer Bjorn Jarvis Salvador sa isinagawang consultative meeting sa Audio Visual Center (AVR) ng kapitolyo noong Enero 18 ngayong taon.

Bago ang pagbubukas muli ng mga biyahe, sisiguraduhin ng LTFRB na maayos ang dokumento ng mga Public Utility Vehicles (PUV) upang mapadali ang mga papeles sa naturang tanggapan.

Kaugnay nito, inalok ni Gobernador Edgardo A. Tallado ng pansamantalang tanggapan sa AVR ang LTFRB para sa pagpoproseso ng mga aplikasyon katulad ng application for confirmation of units for purposes of renewal of registration, application for OR Petition for extension of validity of franchise, dropping of units at acceptance for late filing of petition for extension of franchise.

Ang LTFRB ay magsasagawa rin ng ebalwasyon ng mga isusumiteng Special Permit, Application for Consolidation at Modernization Program.

Niilinaw rin na tanging mga kooperatiba at korporasyon lamang ang bibigyan ng Special Permit.

Unang hiniling ni Gobernador Tallado na mapayagan ang muling pagbiyahe ng mga pampublikong sasakyan maging palabas at papasok ng lalawigan kalakip ang pagsunod sa Minimum Health Protocols sa COVID-19.

Kabilang na ang 60% passenger capacity sa loob ng Camarines Norte, 50% passenger capacity mula Camarines Norte palabas ng lalawigan at dadaan sa mga Quarantine Control Checkpoints at magsusumite ng mga required documents at kailangang nakasuot ng facemask at faceshield.

Kaugnay nito, inihahanda na rin ng pamahalaang panlalawigan sa pamamagitan ng tanggapan ng Community Affairs Office (CAO) ang Online Travel Pass Application dulot ng inaasahang pagtaas ng bilang ng mga taong papasok at lalabas ng Camarines Norte dahil sa muling pagbubukas ng biyahe.

Ang iba pang detalye at kabuuan ng mga patakarang ipatutupad ay nakapaloob sa Executive Order na ilalabas ng tanggapan ng gobernador sa mga susunod na araw.

Lubos naman ang pasasalamat ni Gobernador Tallado at ng buong Incident Management Team (IMT) sa pamunuan ni LTFRB Regional Director PMajGen Antonio N. Gardiola Jr. sa naging maagang pagtugon nito sa kahilingan ng transport sector sa lalawigan. (RBM/ROVillamonte/PGCAO-PIAV/Camarines Norte)

More Brazil News

Access More

Sign up for Brazil News

a daily newsletter full of things to discuss over drinks.and the great thing is that it's on the house!